السبب الحقيقي
========
المتسبب الحقيقي
فى ثورة الغضب أو الاحتجاج
هو النظام
مهما لفينا أو دورنا في الكلام
والنظام عمره ما كان فرد
مهما كان الفساد ماشى تحت ظله
أو بيستخدم توقيعه وختمه
........
......
راجل عظيم حربي قدير
أب حنون لكل المصريين
عاش عمره كل هدفه
يشوف مصر عايزه أيه
أيه ناقصها بره وجوه
وحقيقي بني مصر تانيه
والعمار كان فى عهده زى المنار
عمار كان محتاج مئات السنين
الكل يشهد إن العمار كان كتير
وكان للأسف واثق
إن اللي حواليه عندهم ضمير
............
رجل واثق في شخصه
رجل بيعرف ربه
رجل بيحب شعبه من كل قلبه
وواثق إن الشعب كله بيحبه
قلبه ابيض مليان بالخير
ومن بياض قلبه انشأ حزب
وجعله هو الحزب الكبير
................
للأسف ....... مكنش عارف
حجم الظلم اللي الناس عايشاه
حزبه أصبح زى الغول
عاملين قدامه أحباب
ومع الشعب عاملين ذئاب
همه السبب في اللي حصل
همه السبب في كل خراب
............
أصبحوا مافيا اصبحواعصابات
عايشه هدفها تنهب البلد
عصابات مايهمهاش مستقبل للبلد
ولا ستر البنت ولا زواج الولد
من ظلمهم البنت بارت
والولد مش لاقى عمل
والغلبان بيصرخ لرب السما
.............
عاش بيهم وبينهم مخدوع
كانوا شبكه زى الإخطبوط
موجوده في كل موقع عمل
موجوده فى القرى والمدن
وفى كل شبر فى مصر
كان ليهم خيوط
...............
أصبحوا همه كل مصر
ومصر منهم بتبكى في خجل
أصبحوا همه أصحاب العمل
خلوا الجنيه مالهوش تمن
ولأجل يقضوا على باقي البلد
باعوا همه البلد
باعوا واشتروا فى قوت البشر
اخترعوا سراب الخصخصة
قالوا ده خير زياده للبلد
محدش هياخده واهه جوه البلد
باعوا البلد مابينهم في جلسة فرفشه
البائع همه ... وهمه برضه اللي اشتروا
...............
قالوا البلد خلاص جوه جيوبنا
نحكم فيها ونرسم بالفهلوة
وعلى رأى كشك الله يرحمه
بالونجز كله بينجز
المليونيرات زادوا في البلد
والفساد أصبح جهر وعلن
.............
........
والراجل أبو قلب طيب فرحان
فاكر إن شعبه حقيقي اغتنى
فاكر أننا عايشين فى بغدده
مش دارى أن حزبه ناهب البلد
والشعب بيصرخ من الألم
...........
جوه العيش عجنوا للشعب الزلط
المجتهد قتلوا فيه الامل
الأمين لوثوه بالأذى
الحقير بالنهب اغتنى
الكل بيسرق في النهار
معدش فيه خوف خلاص
البلد أصبحت خراب
حزب واحد حزب فساد
على بابا موجود في مكان
صاحب معالي .. ماشى في أمان
...............
حزب زى الإخطبوط
فروعه ماسكه البلد
والكل أصبح في كبت
وقلبه مش على البلد
إهمال وإهدار ونهب ماله عدد
أصبحنا بأيدنا بندبح البلد
............
واللي بيحب البلد
واللي يخاف من الغلط
تلقاه عاطل عن العمل
أو تلقاه يرفض العمل
في حكومه عايشه لنهب البلد
لأنه شايف خط سيرها غلط
أو تلقاه بيعانى الاضطهاد
من عصابات حزب الفساد
أو يمرض ومن غيظه
يموت شهيد للوطن
حزب وطني حزب نازي
من عمايله الشعب أنقهر
وحصل ماحصل
من شباب فاقده الأمل
شباب زى الورد
عايشين عاله بلا عمل
عايشين كأنهم أغراب
وهمه مستقبل البلد
..........
ريسنا الغالى
قول لأولادك ارجعوا
نادي عليهم من اجل الوطن
ازرع لهم الامل حقيقة وعمل
وظيفة وسكن فرحهم بالعمل
...............
مصر غنية ياريس
وأنت سيد العارفين
أصحاب الملايين فيها كثير
والغلابة محتاجين
....................
مصر قويه ياريس
وأنت سيد العارفين
بجيشك المخلص
وشعبك الوفي الامين
تقدر تصلح كل الأمور
بجيش مصر المحترم
تقدر تعيد ترتيب البلد
........
وبعقل مبارك الكبير
تقدر ترجع حب الملايين
أنت الغالى وأنت الكبير
مهما أتولى غيرك رئيس
...................
أوعى تسيبنا للأمواج
تتلاعب بالشيوخ والاطفال
والأمهات تبكى على الشباب
حرام البلد تبقى خراب
حط أيدك فى أيد ولادك الشباب
دخلهم باب الامل بسرعة قوام
......................
اسمح لي أقولك رئيسنا مبارك
أوعى تسيبنا قبل ماتطفى النار
................
سيدي كن على حذر
من دعوات كل من ظلم
على يد خلايا حزبك القهار
الحزب اللى مص دم البلد
حزب حرام ينتسب للوطن
.............
بنحبك وهتقدر أنت بحبك لشعبك
تعيس العمر أنت الكبير المبارك
بنحبك ومن حكمتك وخبرتك وعقلك
ممكن يستشيرك كل رئيس بعدك
وتفضل مبارك وتعيش مبارك
فى دارك وسط شعبك واولادك
...........
لا أريد أن اختم حديثي
حروفى تتسابق وتُبكى عيونى
الله معك وقلوبنا لك تستريح
يا جبل لا ولن يهزك أو يهزمك ريح
الله معك الله معك الله معك
==========
دمت سيدي لنا بحفظ الله
مواطن مصرى
ليست هناك تعليقات:
إرسال تعليق