احكى يا شهريار
========
القلم سلطان ....... مملكته من حروف الكلام
يأمر الحرف . يطير ع الحرف . يقول موال
حرف يشد حرف ... الاتنين يبكوا بدمع الآه
حرف مكسور. لغيره مجرور . أسير حيران
حرف ساكن . تشوفه كأنه نايم . وحيد دبلان
حرف مفتوح . مليان بالخوف . وفوقه ثعبان
.....
نادى القلم ع الحروف ....... جه يوم الزفاف
عروسته ورقه جميله ......... بياضها شفاف
جات العروسه ....... خاضعه ذليله لشهريار
قالت للقلم .. يلا يا ملك أكتب حروف الهيام
نادى القلم على الحروف ..همه شهود الغرام
نادى على شيوخ الكلام ... لاجل تعقد القران
خط القلم بسن الاَلم ...... بكلام جميل ولا نام
الحرف همزه .... الكلمه لمسه .... فيها حنان
خط القلم . داس القلم . خلصت سطور الكلام
ماتت شهرزاد .... ولسه .. ما خلصش الكلام
........
......
نادى القلم وقال .......... هاتولى غيرها قوام
انا لسه باقى عندى ........... كتير من المداد
طارت اليه ورقه ..... من اللى بيحبوا الكلام
قالتله ...... يلا أحكى قول براحتك يا شهريار
الورقه كانت كبيره ....كانت عطشانه للكلام
كتب فيها كتير وتعب ..... نام فوقها شهريار
ضحكت الورقه الخبيثه ........ على شهريار
سطورها باقيه كتيره ....لكن .... شهريار نام
طارت من تحت منه ...... راح وقع شهريار
وقع على الارض ..... لانه فاضى من المداد
ضحكت شهرزاد .... قالتله روح هات المداد
وبكره يا ملك تعالا ..... نحكى ونكمل الكلام
ضحكت شهزاد ...... طارت مطرح ما جات
وادرك شهريار الصباح . نام من غير المداد
========
قلم الصابر
ليست هناك تعليقات:
إرسال تعليق