ما لهوش هنا مكان
===========
ايه اخدنا من الصمت
غير أسيه وعذاب ووهم
الحقيقه دايماً مقفول عليها باب
بالوهم نعلا لفوق نطير فوق السحاب
او نغرد مع البلابل وجوانا سراب
او نطلع برج عالى فوق فى الخيال
او نعمل قديسين ونقول قلنا وقال
او نعمل مدرسين ونصحح فى الكلام
لاننا شاطرين قوى ... بس فى الكلام
***
الحقيقه جوانا
بتقول كلام غير الكلام
الحقيقه مره
وكل اللى جوانا ظلام
والحقيقه وكل الحقيقه وكل الكلام
احنا فين .. احنا مين .. احنا بكام
***
الحقيقه
عباره عن سؤال وراه سؤال
ومهما جاوبنا
هنلاقى لسه فاضل فيه سؤال
والسؤال اللى باقى
دايماً اصعب سؤال
نخاف حتى نسأله
نخاف يقوله اللسان
وتمر بينا السنين
والسؤال نفس السؤال
نعاشر ناس
نفارق ناس ونقول زمان
نعاشر ناس بالامل
نلاقى طريقهم سراب
نفارق ناس من الالم
نلاقى روحنا نِحن تانى للعذاب
***
كداب يللى تقول
انك فهمت الدنيا
الدنيا دى مدرسه
الاستاذ فيها احتاس
عايشين فيها وعليها
فى امتحان وراه امتحان
فى النهار
نجاوب على الاسئله
وفى الليل
نحلم تانى بكام سؤال
وتمر سنه وراها سنه
والامتحان شغال
ويوم ما ناخد الشهاده
كده يبقى خلاص
يسكت كل الكلام
لا فيه اجابه ولا فيه سؤال
واللى كانوا
عاملين لينا احباب
نلاقيهم بسرعه
هالوا عينا التراب
وكام دمعه تنزل
من عيونهم قدام الناس
ونبقى صوره
مركونه على الجدار
عليها شريطه سوده
علشان تقول للناس
ان صاحبها خلاص
ما لهوش هنا مكان
======
تحياتى لكم
الصابر
ليست هناك تعليقات:
إرسال تعليق