انت يا أخينا
=====
انت يا أخينا مالك زعلان
مش عاجبك منى أى كلام
قوللى يا أخينا عايز اكتب لك ايه
قوللى على طبعك وانا امشى عليه
بس يكون طبع جميل وله عنوان
وقلمى جاهز يكتب لك أى كلام
انا يا عزيزى راجل مش متعلم
وعلامى بيسموه مؤهل متوسط
الانجليزى معرفوش والفرنسى مفهموش
لغتى هى العربيه والباقى عندى مغشوش
بكتب زى ما تيجى المهم تيجى فى الجون
بكتب ولا أخاف الا من رب وخالق الكون
بحب لسانى العربى وهو حياتى ودنيتى
بحب بلادى العربيه همه اهلى وعزوتى
الكلمه ياصاحبى صك ادانه او اتهام
والكاتب بيتكلم بالقلم لانه هو اللسان
ان عجبك كلامى قوللى مشكور عليه
ان كان فيه غلط شاورلى بأيدك عليه
يمكن اطلع غلطان وأقولك اسف وندمان
ويمكن تطلع سيادتك غلطان ومش فهمان
جل من لايسهو أو يخطأ فى الكلام
لاننا كلنا بشر والبشر دايماّ خطاء
الدنيا حوار والكلمه مفرده بلا معنى
بالرغم من انه ليها فى القاموس معنى
وحسب وضعها فى الجمله بتحدد المعنى
الكلام الجد له معنى الغلط دايماّ بلا معنى
عيب يا أسد تغلط فى الكلام
انت الملك والكلام له حساب
يلا بقه نقول سماح وننسى اللى فات
ونفتكر دايماّ اننا اخوان مش اغراب
======
كلمات قلم الصابر
تحياتى
ليست هناك تعليقات:
إرسال تعليق